O LABORATORIO

Do noso Club de Ciencia gústanos todo. Bueno, a dicir verdade, todo, todo, non. Non nos gusta o feito de non ter un espazo específico para facer todos os nosos experimentos.

O que pasa é que hoxe fomos visitar o laboratorio do IES Ramón Mª Aller e menudo laboratorio!! Pipetas, matraces, tubos de ensaio, vasos de precipitados, microscopios... Por ter, ata teñen un aparello para lavar os ollos en caso de que, por accidente, che entre neles algún produto químico de entre todos os que hai alí. 

E está claro! Ao ver o seu laboratorio tamén nos entraron gañas de ter nós un. Cando o señor Conselleiro volva visitarnos imos pedirllo. E que non sexa un laboratorio calquera, que nós tampouco somos uns científicos calquera!! E, como é de Lalín, malo será que non tire un pouquiño por nós.

No IES tratáronnos de marabilla. O profe de Bioloxía, Guitián, foi un moi bo anfitrión. E as súas axudantes, xa non digamos!!!!

Grazas a Silvia pola súa cálida acollida. 

Grazas a Luís por amosarnos o seu laboratorio e algúns segredos da Ciencia agochados alí. 

Grazas ás Marías, Alba, Ainhara, Noelia, Vera e Mariem, pola paciencia que tiveron con nós e polo agarimo que nos transmitiron.

Grazas a Mª Luz, a da cafetería, por agasallarnos cun paquete de chuches que, aínda que sabemos que son un material altamente "radioactivo", non pasa nada por comelas un día.

Moitas grazas a todos e a todas! A eses maiores, por comprender que o noso mundo, o dos pequenos, é un mundo fascinante, cheo de curiosidade, de gañas de aprender e tamén, con moitas cousas que ensinar.