O XOGO DO PILLA PILLA

A quen non lle gusta xogar ao pilla pilla? A ninguén, verdade!!

Que vos parece se hoxe no noso obradoiro xogamos?

Que imos precisar:

• Pratos fondos.
• Leite enteiro.
• Colorantes alimentarios de distintas cores.
• Fairy.
• Bastonciños dos oídos.
• Un pouco de auga.
• Cámara de fotos.

Como o imos facer:

Vertemos leite no fondo dun prato. Deixamos caer unhas pingas de colorante alimentario, de diferentes cores. Mollamos un bastonciño nun pouco de Fairy, metémolo dentro do prato e a xogar!!!

A todas estas marabillosas creacións quitámoslles fotos e  con elas fixemos fantásticas composicións.

Explicación científica:

O leite, aínda que parece uniforme, non o é. É unha mestura de auga, proteínas, minerais e ademais, está cheo de microscópicas pingas de graxa que non se poden ver a simple vista.

Cando poñemos colorante, este queda quieto flotando no leite, porque non lle gusta moito mesturarse coa graxa. Pero cando engadimos unha gotiña de xabón, ocorre algo máxico.

O xabón ten unha parte hidrofílica á que lle gusta a auga e outra hidrofóbica á que lle gusta a graxa. Entón, cando o xabón toca o leite, empeza a buscar e tratar de atrapar a graxa que hai nel. É coma se estiveran xogando ao pilla pilla. O xabón tentando pillar as pinguiñas de graxa.

Mentres o xabón se move para pillar á graxa, empurra ao colorante, e por iso parece que as cores se moven e fan camiños por todo o leite.

En realidade, non é o colorante o que se move só, senón que o xabón e a graxa están facendo unha especie de "baile químico" debaixo, e o colorante é o que nos deixa ver ese baile.

A CRISTALIZACIÓN DO SAL

Pensades que os magos son os únicos capaces de facer desaparecer cousas e logo facer que volvan aparecer? Pois vai ser que non!! A Ciencia tamén o pode facer e se non o credes estade ben atentos.

Materiais necesarios:

• Vasos transparentes.
• Auga quente (preparada por un adulto).
• Sal de mesa (varias culleradas).
• Culleres para mesturar.
• Colorante alimentario.
• Limpapipas para que os nenos/as fagan diferentes formas.
• Fío.
• Un pau para suxeitar o fío no bordo do vaso.

Como se fai? 

Agora que xa lle collemos o gusto a isto das mesturas, imos seguir mesturando. Pero esta vez vai ser auga con sal. Con moito, moito sal!

Despois, cuns limpapipas imos crear distintas formas. Podedes facer todo o que a vosa imaxinación vos propoña. Nós faremos espirais.

Meterémolas dentro do vaso da disolución e ... A agardar! Que unha das cualidades de todo científico é a paciencia.

Despois de varios días de espera... Tic, tac, tic, tac!!! Descubrimos que ao sal gústalle facer de spiderman. Agatuñar pola espiral.

E, que imos facer con tanta espiral? CREAR.

Pelo Cristalizado.

Explicación científica:

Cando mesturamos auga con sal, a sal desaparece porque a auga desfaina en anacos tan pequenos que non os podemos ver. A isto chamámoslle disolver.

A auga ten moito poder para disolver pero cando a facemos traballar moito, isto é, se lle botamos moita, moita sal, a auga acaba cansándose de tanto traballar e deixa sal sen desfacer. Dicimos entón que a sal precipita.

Se deixamos a mestura quieta uns días, a auga vai desaparecendo pouco a pouco, evapórase, é dicir, convértese en vapor que sobe polo aire.

A medida que a auga vai desaparecendo a sal que ela fixera desaparecer volve a verse en forma de cristais.

PINTURA EFERVESCENTE

Que terán as burbullas que volven tolo a todo o mundo!!!

Pois hoxe quixemos tolear e por iso fixemos un experimento cheo de burbullas.

Que precisamos?

• Bicarbonato.
• Vinagre.
• Colorantes alimentarios.
• Vasos.
• Papel para acuarela.
• Pinceis.
• Conta-gotas para botar o vinagre.
• Matraces.

Como o fixemos?

Levando a cabo dous experimentos.

Primeiro, mesturamos témpera con bicarbonato e creamos debuxos con esa pintura sobre a que logo seixamos caer gotiñas de vinagre. Como burbulleaban!

No segundo experimento, botamos vinagre con colorante alimentario dentro dun matraz. Logo engadimos bicarbonato e .... Deixamos que as burbullas que foron saíndo foran facendo unha creación artística no papel. 

Que bonitas quedaron!

Explicación científica:

Cando un ácido como o vinagre e unha base como o bicarbonato se xuntan, reaccionan. Comezan a facer burbullas e fsss!, parece que a pintura cobra vida.

Por que pasa iso?

O bicarbonato e o vinagre son como dous amigos moi revulideiros aos que lles gusta bailar, por iso cando se xuntan sempre arman unha festa e ao facer iso crean un gas, o dióxido de carbono. Ese gas quere saír rápido, como os foguetes das festas, e por iso vemos moitas burbullas que explotan, moven a pintura e crean debuxos moi divertidos.