Xa chegou a primavera. Florecen os campos; florecen as árbores e no Club de Ciencia, florece a nosa creatividade. Bueno, tamén floreceron algunhas flores. Queredes saber como? Pois prestade moita atención.
O experimento comezou recortando papel absorbente en forma de pétalos de flor.
Cada científico colleu dous rotuladores, cada un dunha cor distinta. Cun trazaron raias no centro dos pétalos e co outro estamparon puntiños polos bordos. Coa axuda dunha goma, ataron os pétalos arredor dun bastonciño, dándolle forma de flor.
Ao introducir a base da flor nun vaso de auga, o silencio fíxose expectante. Pouco a pouco, coma se a flor tivese vida propia, as cores comezaron a estenderse polos pétalos. Era a polaridade actuando en secreto: as moléculas de auga, atraídas entre si, subían polos finos camiños do papel levando consigo os pigmentos. As flores, antes blancas, convertéronse en obras de arte: manchas que se expandían, cores que se mesturaban, límites que se difuminaban.
Ciencia e arte deixaron de ser opostos para transformarse en complementarios, como dous polos dunha mesma realidade.
Ningún comentario:
Publicar un comentario
Nota: só un membro deste blog pode publicar comentarios.